Un sole chì si ciotta
Mi firmarà in core
I to superbi ochji
Mi firmarà in mente
Una bella attrachjata
Mi firmarà in mente
Sta bella innamurata
Mi firmarà appena
Di lu mare turchinu
Eppo a zitellina
Ch’appaccia ogni pena
Mi firmarà stu pocu
Chì per mè hè assai
Chì face ciò ch'e socu
Oghje di più ch'è mai
Ci firmarà un pezzu
D’a nostra Cursichella
Cù tutt’a so billezza
Luce tale ghjuvellu
Ci firmarà sta tarra
Quella di tutt’e fole
Di sogni tanti cari
À u ciuttà d’u sole
Mi firmarà in sognu
Quessa dolce ghitara
Chì sunava canzoni
Pa u bè è l’amaru
Mi firmarà i ghjorni
D’amicizia tamanta
Quandu mai ùn si dorme
È s’attacca u cantu
Ci firmarà in core
Da pumont’à cismonte
Firmaranu i culori
Di i nostr’orizonti
Ci firmarà stu pocu
Ma per no hè assai
Di lu core u focu
Ch’ùn si spinghjarà mai
Mi firmarà u rossu
Di l’ori sittembrini
Eppo tutti i marosi
Di u mare turchinu
Mi firmarà st’amore
Hè u più impurtante
Mi firmarà stu cantu
Chì sorte da u core
Mai mai u tempu
Ùn pudarà sguassà
Ciò chì ferma in mente
Per tutta l’eternità
Firmi è sempre firmarè
O la me cara amica
A me canzona sarè
U pocu è u micca
Mi firmarà stu pocu
Chì per mè hè assai
Chì face ciò ch'e' socu
Oghje di più ch'è mai