Quandu vecu certe cose
Chì si passanu inde u mondu
Lite è guerre sanguinose
Mi dicu soga ùn gira più in tondu
Puzze è peste vilinose
Attoscanu ogni circondu
Vittima di tanta rubaccia
A pianetta hè malata
Da mulizzu è fumaccia
Cum'è un fornu hè scaldata
È andarà di male in peghju
S’ellu ci hè alcun rimediu
Timpeste è mari furiosi
Sorte di lettu ancu lu fiume
Annighendu ghjente è chjosi
Arruina tuttu u mulume
Scimita hè la natura
Ma ùn ne anu primura
L’aria oghje ùn hè più pura
Cagione di tante maladie
A cosa hè certa è sicura
Colpa hè d’isse pazzie
Si campa cù à paura
Ma ùn cambianu d’andatura
Quelli chì anu lu putere
Incù i ladri di a finanza
Fianu lu so duvere
Chì anu arrubatu abbastanza
Osinnò vinuta hè l’ora
Di lampalli tutti fora
S'è aghju scrittu isti filari
Hè chì ne aghju una techja
Di istu mondu di dinari
Chi avà sbarsa la sechja
È quelli chì sò à l’affari
Ch’elli tendinu l’arechja