Ùn si franca più alcunu
Ogni ghjornu cresce offese
Per disprezzà u cummunu
Tutti parlanu francese
Per ch’ellu capisca ognunu
Si stu populu hè capace
D’ùn tene stu pesu addossu
Discità u can’chì ghjace
È po dalli forza è morsu
Ancu sì à tutti ùn piace
Di parlà è scrive in Corsu
Sta lingua di a Nazione
Ùn po’ micca esse nicata
Quale sia l’occasione
Chì c’hè stata tramandata
U Corsu ghjè a passione
È basta a francisata
Un populu sottumessu
È chì a lingua si tace
Ùn pò più esse ellu stessu
È mancu pò campà in pace
Ma a c’hà provata aspessu
Chì di rivolta hè capace
Tù figliolu di sta terra
Chì porti a lingua in core
Sì a to passione hè vera
Nu a poi lascià more
Fieru dichjara a guerra
À ciò chì hè traditore
Per esse è per campà degnu
Di Cirnu populu altieru
Mai ricusà l’impegnu
Forte sputicu è sinceru
Sia sempre di stu legnu
Chì si face un’omu fieru
Sia sempre cum'è st’omi
Di Paoli u Generale
Chì ùn funu mai domi
Da a putenza culuniale
È chì portava nu nomi
Chjamati in lingua Nustrale