S'inghjinochja cum'è per prigà,
Nant'à a so terra arrida
L'ochji chjosi di pettu à u so fattu
Aspetta, aspetta chì u dulore pianti
Chì lu so corpu si spezzi infine
Sott'à e petrate di a ghjustizia umana
Pò esse veru chì a vita hè vana
Pensa à u fruttu di a so vergogna
Sta vituccia ch'ella vulia tene
Solu un'instante nant'à u so core
Nanzu di sparisce per tropp'amore
….
Sottu à a so armatura di tela
Nimu intravede a so sgumenta
Sguardu viotu è capighjimba,
Eccu e qualità di sta spusella.
Tutt'ognunu festighjeghja a so unione
Cù un vechj'omu, innò un nome
Trema à u penseru di sentelu vicinu
È lacrime bagnanu u so faccinu
Un abbrivu per corre a so pella
À l'idea di duvè toglie a mantella,
È rigalà a so innucenza magna
À un patronu ch’ùn vole sente lagna
….
Nant’à un lettu di paglia sfattu
Sathya ghjace stesa è ammutulita
E mani incatenate à a parete
Pare un pupazzu viotu d’ogni fede
U so corpu trasalta ad ogni passu
È spechja un sguardu da trapassu
A so pella brusgiata ignilocu
Hà per cumpagnia orcu è mocu
A vita à ella l'hà solu straziata
Dipoi chì st'omi l'anu strappata
A tela cusgita à filu di virtù
À sett'anni campà ùn vole più.
….
Pilar stà attenta ad ogni parlà,
Prova à capisce ad amparà
Di scola ùn ne cunnosce chì a parola
Travaglià era da sempre a scelta sola
È si sentenu stridi per e viole
Un novu capu hè passatu è ci vole
À accittà e so regule sceme
Da assicurassi un qualsiasi avvene
Chì pensà s'è ùn cunnosce chè oppressione ?
Cosa sperà d’una rivuluzione ?
Chì di u paese di i diritti umani
Ùn ne cunnosce chè mitragliere è malanni.