Valentini saveriu - Castaneis

chì saria a me sorti
s'è ùn aviu 'ssu passatu
'ssi cosi indicibuli
chì vani sottu tarra
'ssi biddezzi tamanti
chì dani a vita
chì saria po 'ssa criatura magnifica
'ssa maraviglia
'ssu miraculu
s'edd' ùn tuccaia a tarra
ùn credu micca in u mondu for' di tarra
ch'eddi ci dani à creda
ùn emu invintatu nudda

ci francaremu di a morti
aghju travirsatu u tempu
mi sò carcu di soli
di vita
ùn muraremu mai
andaremu à bulicà sottu
è truvaremu
chì nudda ùn mori
tuttu hè vivu
u pueta a m'hà ditta