Da una musa inspiratu
Mai a penna ùn si richeta
Ci hè Orfeu à lu so latu
Diventa opera prufeta
U versu appena natu
A passione ùn li manca
Per creà tanti poemi
Di rimà mai si stanca
Ammenta tutti i temi
U tempu ellu trafranca
Incù poteri supremi
Profana o ancu sacra
Bella rima alternata
Piacente o puru acra
A sorte magnificata
Una vita li cunsacra
Grana d’amor’ suminata
Per fà capì st’universu
Entrimu in e canzone
U ritu ùn s’hè mai persu
Trasmessu cun affezzione
Sufficiente è micca scarsu
Per a gioia o l’afflizzione
Corsica in poesia
U soffiu di l’antenati
Spiritu di fantasia
Furtunati o dannati
Divina allegoria
Di i seculi passati
Una poesia eterna
Grande soffiu essenziale
In nostra lingua materna
A sola per me chì vale
Arcaica o moderna
Sà francacci da u male.