Paese di castagniccia
Un ghjornu ne sò andata
In sti lochi di rasiccia
O cusì bella cuntrata
Per sempre attaccaticcia
Omu m'anu prisentatu
Bigornu di a Custera
U so collu inarialatu
Francatu d'ogni manera
In a Storia rinumatu
Da a pianeta intera
Nant’à strada di Muratu
Sò tre case ùn pò spiccate
Bellu situ acciucciulatu
Petrapola fù chjamatu
Avà per me locu amatu
Un paradisu l’estate
Cughjacce è a so funtana
Dolce spaziu di riposu
Quandu ci hè la sciappittana
Vulenteri eiu ci posu
A so aria fresca è sana
Guarisce u più lagnosu
In e Teghje San Clemente
Da tutti hè onoratu
Tenenu focu ardente
Di u fornu inceppatu
Stu paisolu credente
Rispetta u so passatu
Funtana Gola surgente
A so fonte hè ricercata
Allora si vede ghjente
Quella ch'hè allontanata
Chì piglia l'acqua currente
Di Pelva duv’ella hè nata
Piantemu in l'Annunziata
Vicin'à u campu santu
Cappella ch'hè dedicata
À Maria un' incantu
Una ricchezza passata
Ch'hà un valore tamantu
In Santa Maria Assunta
Di u paese lu core
A chjesa l’anni affrunta
L'aiuta bè u Signore
Vita à morte cunghjunta
Preghenducci cù fervore
L’anziana scola amata
Mez'à parechji casali
Ella tantu rigrettata
Ci campa mondu avali
U merre l'hà trasformata
Cateraghju o quantu vali
Casanova oghje chjosa
Pienghje u tempu landanu
Cusì grande è orgogliosa
Ci stà un paese sanu
Aspetta l'ora preziosa
U ritornu di l'Umanu
Eiu mi sò namurata
D’un paisolu ghjuvellu
U ghjornu ch’o sò fallata
À visità Sammarcellu
Forse una cumare fata
L'hà dipintu à u pinnellu
In Roya San Bastianu
Festighjatu cù passione
Ellu ghjè u guardianu
Di l'antica tradizione
Bigornu hè cristianu
Mostra la so devozione
Ficaghjola chì peccatu
D'inguernu hè guasi solu
Ognunu si n'hè fallatu
In cità luntanu à Golu
Ma si sente disgraziatu
D'ùn esse più muntagnolu
Ogni casa rinnuvata
Ingranda di più l’Amore
A so ghjente ritruvata
À Bigornu face onore
Tutta persona vultata
Divinta ambasciatore.