U rè di u pulinaghju
Eiu vi svegliu à l’albore
Ma riloghjiu ùn ne aghju
Cuccuruccu in clamore
Subbitu à lu primu raghju
Sò una sgualtra capretta
Chì corre per issi pasciali
Ùn mi piace d’esse stretta
Mancu appena in i stazzali
U mo nome hè Bianchetta
O Seguin sò corsa avali
Sò una rossa ghjallina
Bizzichendu è raganendu
Facciu l’ove ogni matina
I vi dò ùn li vi vendu
Nascenu à la statina
Piuli gialli chjuchjulendu
Sò cursinu valorosu
Curu pecure è muntoni
U m’aiutu hè preziosu
Addestru i pagaglioni
Eiu sì sò curagiosu
Facciu più chè i patroni
Sò cignale solitariu
Vistigatu da l’umani
Un machjone salutariu
È i fratelli guardiani
Nentru lu mo santuariu
Mi ne ridu di i cani
Sò a volpe maliziosa
Chì ne face è pò ne face
Cù me nimu ùn si riposa
Arrubu ùn lasciu pace
Di burlà sò venturosa
Mostru di chè sò capace
Eiu sumerucciu corsu
Portu à zozzu i zitelli
Ùn mi si mette lu morsu
Sò dolce cum'è l’agnelli
È nant’à lu mo parcorsu
Femu ride i spurtelli
Sò a vacca nutritora
Ma mancate di rispettu
À rombu di tirà fora
Si ne falla u mo pettu
Sta matina di bon’ora
Comprà vogliu un tenipettu
Sò un porcu grassu è tondu
Ùn facciu micca regime
M’alluntanu di u mondu
Per campà sù l’alte cime
Cum'è riposu prufondu
Un bel’ lettu di cuncime
Sò cavallu muntagnolu
Mi n’impippu di e cità
Mi chjamanu machjaghjolu
Campu incù tranquilità
D’induv’ellu nasce Golu
À chi ùn hà core ùn ci stà
Sò u ghjattu frisgiulatu
I topi sò i m’amichi
Ùn sò mai affammatu
Cum'è i ghjatti antichi
Da la ghjente aduttatu
Ma l’onori sò castichi.