Paisucciu di pastori
La to ghjenti intornu à l’aghja
Campava d’u so sudori
À mez’u granu è la paglia
Cantava u tribbiadori
Deci casi è tantu mondu
Cun pecuri è sameri
À chì era di u circondu
Facìa tutti i mistieri
Si passava n’una siconda
Da a mazzola à li cerri
Ind’u fretu o cù lu cotru
Sulioni o milli venti
Travagliava l’omu nostru
À son di centu surghjenti
È di i donni à u forru
Di u so pani ti ramenti ?
Dui guerri t’ani minatu
Furendu li to figlioli
Mancu un cristianu hè firmatu
Ùn si contani i doli
Nì li petri ch’ani lasciatu
Tutti i mei ind’i Grisgioli
O quantu a so vita hè dura
À li riscappati pastori
Senza donna nì criatura
Da amparà li so valori
È calmà dopu a stridura
Di u paisanu i dulori
Oghji ùn ci hè più animali
Nì caffè nì ghjuventù
L’acqua chì ci corri avali
Hà persu tutta virtù
Sparita a trutta nustrali
Parnici ùn ni bia più
L’Acqualonga hè lu to nomi
Ma l’acqua di a vaddina
Ùn ghjova più tantu à l’omi
Pocu orti à mezu a ruvina
Mancu di i frutti l’aromu
Pomi è cioddi in cantina
Cù la cità chì ti magna
Sè lucacciu maladettu
Hè sparita a cuccagna
D’a Chjosa à lu Ranuchjettu
La Punta d’Isa si lagna
D’avè persu un zitiddettu
T’hà arrubbatu l’Aghjacciu
Ch’ùn hà cura di a to morti
T’hà traditu u Taviracciu
È lasciatu à cruda sorti
Suppurtarè sti minacci
Cun ghjovani è forti bracci?
Ma u raghju mattutinu
Schiarisci a cosa accaduta
Sarà fattu u to distinu
Di furisteri è d’acqua brutta
Contr’à stu mali mischinu
La to voci ferma muta
La to mimoria hè in dolu
D’ùn campà quì ùn mi vantu
Ma pregu à Padri è Figliolu
Ancu voi Spiritu Santu
Salveti u me paisolu
Ch’ùn sia vanu u me cantu.