Sbuffulata capricciosa…
À corri corri per la furesta
Sì tù à fughje, onda preziosa.
Lascia mi stende, lascia mi sente
Lu to ricoccu, lebbiu, briacu.
Parla mi pianu, parla è accende
L’anima fiara turnata magu.
Da inventà ci un antru mondu,
O zitellina, in le to ronde,
Mi porti sempre, è mi cunfondi.
Mai ùn serai da nasconde.
Ballerinuccia spenserata
Dammi a manu, vola luntanu
Sò stata tù, è tù, fatata,
Mi pigli sempre appellamanu,
Lascia mi vede, lascia mi dì.
Fà ti puru un’affaccatella !
Voce nucenza, li to sussuri,
Sò fior’ di l’alma, grande o zitella.