Di vintottu o vintinove
Ma hè maladettu è scortu
Sempre face e so prove
Ortiporiu è Vizzavone
Ponu purtà testimone
Cum’è tutti i secondi
Ellu ùn hè mai cuntentu
Cerca in tutti i circondi
Lu pò truvà un mumentu
Di fà pente à ognunu
D’ùn esse numeru unu
Da Ciriola à Carnavale
In passendu per e Cendare
Sempre à si face vale
À a prima piazza pratende
Incù mascare è viserre
Prova in tutte e manere
À dice ancu u pruverbiu
È mi pare ghjustu è sennatu
Ferraghju hè un mese azezu
Hè cortu ma hè scrianzatu
Di l’invernu vole esse patrone
Vole a prima pusizione
Da capu à u lingnaghju
Sia di lecciu o d’alivu
Sempre a focu imburratu
Da u caminu vicinu
A mezu à ghjennaghju è marzu
Ellu face spessu u pazzu