Nant’à i passi di ‘ssi grand’omoni
Di Fred Scamaroni è Ghjuvà Nicoli
Di Ribellu, di Giusti è Mondoloni
Ti ramentu tamantu sacrifiziu
Di s’omi per difende l’umanità
Quand’ u mondu era in precipiziu
È in gran’ periculu a libertà
Ne vogliu discità à to memoria
È accende a fiamma di l’amore
Fà luce notte, ghjornu è a tutt’ora
A stella di a pace in lu to core
Ti portu per a manu versu l’avvene
Nantu e strade fiurite è prufumate
Ricordati chì corre in le to vene
U sangue di ‘sse stonde straziate
Ti portu nant’ à via luminosa
Cù vetta d’alivi sempre in manu
Tutu di biancu vestutu cum’è a sposa
Per u più bellu sonniu di l’umanu
Surella è fratellu di stu paese
Ùn ti scurdà mai più di a to storia
Prova di mantene sempre accese
E bruste ch’anu fattu l’anima toia