Tramindui à tempu nati,
Sposti à u soli, u calori
À bon'ora sò sbucciati
U prima t'avia u sonniu
D'andà à tuccà u celu
Ed avia u bisognu
Di crescia cun forza è zelu
Si tensi tutti i candilucci
D'acqua falata è di guazza
Da essa à mezu à i fiurucci
U più grandi di a so razza
Ùn avia, parini foli,
A vargogna di piattà
À u frateddu lu soli ;
Ci vulia ad ingrandà !
U sicondu, eddu, pinsò :
"Chì tanti celu è distinu !
Chì ci hè da fà quì inghjò
M'aspittàrà u Divinu…
Sbuccià, apra si, lampà
L'amacu à l'apa, u bufonu
Pocu impremi l'ingrandà
Basta à fà travagliu bonu".
Era bidducciu anch'eddu
Ma d'una biddezza à scopra
Piatta bè da u frateddu
Chì u fighjulava da sopra
Era fieru lu maiò
U più beddu, u più altu,
U più drittu chì campò
In stu magnificu pratu
In cori di sta matinata
Spassighjava un ghjuvanettu
Pinsendu à l'inamurata
Si cuglia un mazzulettu
Ghjuntu à mezu à u verdi pratu
Schiaritu da un beddu soli
Avvistò u fiori altu
Maravigliatu, u si colsi !
U prima fiori finì
Siccatu è senza statura
U sicondu eddu murì
À l'usu di mamma natura
Impiì a tarra nativa
D'i so casci, di u stiglioni,
A so vita ghjuvativa
U purtò versu u Maioni
A murali a cunnisciti :
Ùn vali à tuccà u celu
Chì si guastani i viti
À supranà un frateddu.