À tutte e donne amate
Dolci mumenti chì omu hà
À quelle cunnisciute pocu
Chì a sorte face mutà locu
È ch’ùn pudemu ritruvà
À quella chì cum’è un acellu
Stà una stonda à u purtellu
È chì più prestu si ne và
Ma u so galbu graziosu
Cusì bellu è cusì pumposu
Sempre l’ochji face spannà
À a cumpagna di viaghju
Chì u sguardu dolce paisaghju
Ci face u camminu accurtà
È ancu par esse capita
Da voi luntanu hè fughjita
Senza una manu carizzà
À quelle chì ghjà sò pigliate
Campendu ore poche sebbiate
Cù quellu chì cambiatu hà
Vi lascianu cù nustalgia
Vede tutta a malincunia
D'un avvene senza sperà
O care maghjine illuse
Spiranze d'un ghjornu diluse
Dumane ùn sarete più
Chì quandu omu scontra l’amore
Tandu spessu si scorda u core
Di ciò chì arimane fù
Par avè sbagliatu a so via
Sunniemu incù un’oncia d’inviglia
Ramenti di a giuventù
Un basgiu ch’ùn emu pigliatu
U core sempre aspittatu
È l’ochju ch’ùn s’hè vistu più
A sera davanti à u focu
Quandu cum’è un rimitu stocu
Ricordi di i tempi fà
Si pienghje e labre assente
Di quelle ch'ùn sò più prisente
Svanite avà di core in là
D'appress'à "Les passantes" d'Antoine Pol