Aviamu i listessi anni
Sentu u to cantu d'aceddu
Fendu coce li to pani
O Larè, fiore di u paese
Li to ghjorni eranu vani
È puru davant'à lu forru
Eri a fiirtà d'u to babbu
Le to mane eranu d'oru
È tù ùn avii in capu
Cà buntà è ghjintilezza
Amicizia è tinnarezza
In guerra no semu andati
Lascendu i nostri figlioli
Li nostri parenti amati
L'aliveti di Lioli
La vigna di Mulivechju
È la biada d'I Puzzoli
A nutizia via via
Hè vinuta da a campana
Zi' Agustu a risintia
Ricuddava da a campagna
Di Matalena si sintia
Lu pientu da Sarri à Cagna
Li toii è lu to figliolu
Anu campatu u dulore
Sò firmati cù u dolu
Privi di u to amore
La vita fù senza gustu
Par Matalena ed Agustu
È mi volte sempre in mente
La to voce di ghjuventù
Chì palisava à la ghjente
Ciò chì tù sapii tù
Dissi à vicini è parenti :
"In Sarri, ùn ci voltu più..."
Ti rivecu o lu me amicu
Nant'à u zogliu di casa
È sentu com'è un casticu
L'ultimu di a to frasa
Oghje ancu eiu sò par more
È pienghje sempre u me core.