Guidoni Musantu - Paghjella

Ai insulcatu mare è monti
Per intraprende l’universu
Oghje i cinque cuntinenti
Ricunnòscenu u to versu
Sì di Rusiu o di Sermanu
Cantu sacru o prufanu

Ci hè quella di Ponte Novu
È quella di l’ Impiccati
Omi fieri di U Niolu
Chì sò stati marturiati
Po ci hè Barbara Furtuna
Cantata da l’esilati

Ci hè quella di A Tribbiera
Cù Bucchisgiolu è Muvrone
L’Impiaghjera è Muntagnera
Da Balagna à San Pedrone
Sì cantu di stu reghjone
Quellu di babbu è babbone

Canti l’amore è e gioie
Canti l’angoscia è l’affanni
E disfatte è e vittorie
A salvezza è i malanni
Canti per l’umanità
Sì cantu di Libertà

Ne canti ancu per Diu
Eppo pè A Santa Croce
Tantu in corsu chè in latinu
Presti sempre a to voce
Canti u mortu è u vivu
Canti per l’esse nativu

Sì cultura universale
Sì cultura paisana
Arradicata à sta tarra
Sì ghjesale o prufana
Sì cantu di Cursichella
Sì tù l’éterna paghjella