Tracarca à fiure è à rime
Quandu parte à corre è pasce
Nant’e più fiurite cime,
Po chì ritorna cun fasce
À mutà sponde sublime.
Mi piace quand’ella passa
Eppo dinù quand’ella vene
Quandu strida o stà bassa
Quandu cunforta è sustene
Quandu crea, quandu sguassa
Quandu inventa per l’avvene.
Mi piace quand’ella ride
È dinù quand’ella pienghje
Quandu lampa e so sfide
Quandu ùn vole u verbiu « spenghje »
Quandu mostra e strade fide
Quandu invita à ùn rimpieghje.
Mi piace quand’ella balla
Quandu si campa eppo canta
Quandu cun core si stalla
Chì c’intinghje è chì c’incanta
Quandu cum’una farfalla
Si sveglia a musa tamanta.
Mi piace quand’ella hè gioia
È dinù quandu hè tristezza
Quandu fastidia o annoia
Quandu cunforta è carezza
Quandu denuncia u boia
È à casu, u si disprezza.
Mi piace quand’ella hè sognu
Quand’ella stende e so ale
Quand’ella accheta u bisognu
Quandu imbellisce u reale
Quandu alluntana u demoniu
Fendu u nurmale, speziale.
Mi piace quandu hè rivolta
Quandu punghje l’inghjustizia
Quandu ogni voce ascolta
Chì difende cun divizia
Difendendu à rima sciolta
Quandu ogni stonda hè prupizia.
Mi piace quand’ella dice
È dinù quandu si tace
Quandu si stà à l’arice
Quandu offre ciò chì piace
Chì da tristezza à felice
Alza un ponte di pace.
Mi piace quandu viaghja
Ch’ella pichja è cuntrasta
Quandu gira ind’è l’aghja
Chì si face cineasta
Po quandu u mo core scaghja
Mi piace a puesia… è basta!