Da sfrisgiami torna incù fiori di carta,
Fendu d’ugni rima una richezza sparta
Tracciami un mondu tessu di puesìa.
Dammi in sicretu i più beddi paroli
Ditti à chjus’ochji d’un suffiu dilicatu,
Dipinghjendu l’ori à l’inchjostru fatatu
Portami incù tè à scopra un altru soli.
À passi sicuri andemu appalamanu
Eppo fammi baddà nantu à bianchi rinaghji,
Arruba à l’alba i so più beddi raghji
Da ricamà righi incù muschi di branu.
Sumina filari à virsura di seta,
Barattendu sonnia è basgia à l’infinita,
Zifremu insemi u libru di issa vita
Abbracciati pà sempri u me caru pueta.
Scrivimi
Ch’in silenziu mi spengu
Scrivimi
Dimmi chì t’appartengu
Scrivimi
Quantu caru ti tengu