Guidoni Ghjacumu santu - Pace è salute

Pace è salute à tutti
Vi auguru per l’annu novu
Gioia è prusperità
Sempre in festa è mai in dolu
È saluta à vulintà
Santa  pace in Cursichella
È in tutta l’umanità

Quella spunti un’alba nova
Tracarca di fratellanza   
Chì a mamma ùn sia mai sola
Quand’ella chere speranza
È chì sempre in ogni fucone
Luci a fiamma di Babbone

U tizzone di u ricordu
Quell’ ùn sia mai spentu
È u ventu di l’accordu
Fia sente u so cantu
Da a piaghja à a muntagna
Da Cinarca à a Balagna

Chì a voce di l’amore
Canti sempre in armunia
È chì mai in lu core
Ùn ci sia malincunia
È chì sempre ogni  zitellu
Sia liberu cum’è l’acellu

Vecu una  culomba amata
Cù u volu maestosu
Di pace immaculata
Ghjuvellu u più preziosu
Ella stende e so ale
D’amore per ogni casale