In un trambustu chì pare l’infernu
Solu à dì u so nome hè una dulcezza
Hè stata chjamata Corsica pà l’eternu
Pà seculi è seculi da l’invasore
Marturiata, imbavaghjata è tradita
U so populu cù curaghju hà presu à core
Di salvà a so tarra ancu cù a so vita
Cumbattidori di tutti i lochi isulani
Ghjuchendu à piattatella cù u nemicu
Barbarescu, Genovesu o Pisanu
Ùn l’anu mai lasciatu metta un ditu
U nemicu incultu vulia assughjettì
Un populu fieru di a so eredità
Ma in pocu tempu l’hà fattu capì
Chì ùn si sarianu micca lasciati spuglià
Trà guerre è pace i seculi sò passati
L’omu bonu o gattivu nasce è more
Ma l’usi è tradizione sò firmati
Ancu sì a speranza hè sempre l’amore
L’ombra di e torre silenziose
Guardiane di a storia di sta tarra
Fiere testimone è maestose
Ci servenu pà seculi di caparra