Induve straziu inde u bughju
Cunfondu a notte è u ghjornu
Nimu ùn sente quand'e mughju
Fatemi vede u lume
È dinù falà in carrughju
Strappate le mo catene
Fate saltà u marchjone
Chì tamante sò le pene
Di campà cusì in prigione
Ùn basta annant’à e scene
Di fammi sente in canzone
Belle sò le mo canzone
Lamenti incù e paghjelle
Cantate incù passione
Da le voce le più belle
Ma finitu ch’ell’hè u cantu
Prestu sò messe da cantu
Incù le mo parolle chjare
Quellu versu ognunu piglia
Per isse stonde belle è care
Micca ùn c’hè a mo pariglia
Ma sò sempre ore amare
D’ùn sentemi più in famiglia
Sò intruta indu e scole
Ma chjosu anu le porte
Ancu sì e chjave sò nove
Fora ùn possu micca sorte
Malgratu belle lizzione
Muta sò in ricriazione
Sia in piazza o per le strette
È in l’amministrazione
Culà attenti à e fette
D’aduprammi ùn hè quistione
È per mè sò messe dette
S’ellu ùn c’hè evuluzione
Sò a lingua di a tarra mamma
Quella d’un populu fieru
O corsu senti la mo chjama
Chì sò oghje à l’addisperu
Ùn lascià spegne la mo fiamma
Abbiane maiò pinseru
Sò una lingua latina
Aghju ancu la mo bandera
Dinù u Salvi Regina
Micca solu per prichera
Maiò saria la ruina
Sì ind'è mè fussi straniera
Lingua Corsa sò quella
Di la mo vechja Nazione
Lingua Corsa sò ella
Di l’esse è a tradizione
Ùn possu esse cà eiu
A Lingua di u paese meiu