S’e avissi u putere
Di pudè cambià u mondu
A faria incù piacere
Per ch’ellu girga più in tondu
Per fà finisce le guerre
È dinù salvà u circondu.
S’e avissi a putenza
Adupraria le forze
Per fà sparte l’abbundanza
Di a pianeta e risorze
Ghjuvendumi cà di l’arme
Per chì nimu ùn morga di fame.
S’e avissi a sapienza
A struzzione è u naturale
S’e era d’alta intilligenza
Di rinumata universale
Tandu faria chì a scenza
Possa curà ogni male.
S’e avissi donu divinu
È i miraculi pudè fà
Cambiarà lu distinu
Di à chì nasce per strazià
Eppo esse dinù induvinu
È ancu e disgrazie parà.
S’e avissi lu cummandu
Pigliaria e dicisione
Per chì più lu mondu tandu
Si trovi in situazione
Di fà more u puarellu
Per tratichjà u riccone.
Chì u riccone ùn si ne face
Quessa eiu aghju capitu
Mancu appena li dispiace
Mai ùn pisarà un ditu
Chì lu troppu techju si sà
Micca crede u famitu.
S’e fussi lu più supranu
Truvaria le manere
Per fà u mondu più umanu
Senza muri nè fruntiere
Denduci tutti la manu
Libari senza galere.
S’e fussi lu criatore
Cambiaria oghje a fiura
Fendu di a tarra un fiore
Mezu à un nidu di virdura
Induve ghjustizia è amore
Sarianu a maiò primura.
Una stonda à le mo brame
Chè vogliu di core stridà
In lampendu le mo chjame
Pè ùn lascià soffre è tumbà
I zitelli da la fame.
