Oghje mi vene a nustalgia
Videndu ch’ella si dichjara
Una pessima malatia
Chì u berbante si pripara
À fà di tè una marcanzia
Ùn poi esse una marcanzia
Ch’ognunu puderia dispone
È avè ancu l’albasgia
Incù i soldi esse patrone
Per mè quessa hè una pazzia
È ne dò a spiecazione
Quale pò cumprà o vende
Di u to sole u splendore
Quandu cù i so ragi accende
A natura à u primu albore
È chì u so lume si stende
Fendu sbuccisce ogni fiore
Ùn si pone vende o cumprà
E to belle sponde rinose
Induve u mare vene à minà
Incù le so acque furiose
O quandu calmu carizzà
E fale piaghje luminose
Quale puderia pratende
À e to sarre arraccamate
Chì pone luce è splende
Quad’elle sò incasgiulate
Innò ùn ci hè soldi à spende
Chì isse loche sò sacrate
Mancu ponu avè patroni
L’elpe e grotte è i sciappali
E case di li muvroni
E vaglie di li cignali
E fureste è i ghjargaloni
L’imbistite di l’animali
Quale puderia cumprà
U chjuchjulime di l’acelli
Chì si sentenu cantà
Allegri cum’è zitelli
Felici d’esse in libertà
Indù i circondi li più belli
Ùn si ponu dinù incittà
I to prufumi è l’aria pura
L’acqua chì si sente cantà
Quandu lu fiume sussura
Innò ùn ci hè oru per pagà
I ghjuvelli di a to natura
Tarra meia tantu amata
È di tanti omi di sanna
Induv’ella ci hè nata
A sterpa di babbu è mamma
Tarra d’un populu fieru
Di de Paoli è di Sampieru
S’è tù ùn capisci isse cose
S’è tù ùn a senti rispirà
Indù e so loche maravigliose
Ùn sè degnu di campà
A ti dicu cù e mo improse
Cum’ella hè lasciala stà