Quissa reti immatiriali,
Ch’allusinga senza mali
A menti insunnachjita,
Di chì credi chi a vita
Ùn hè altru ch’è virtuali
Chjusi in i stanzi bughji
U so unicu attichju,
Hè di rimirà u spichju
Chì ugni bon sensu strughji,
Quandu u spiritu fughji
Incuscenti di u spavichju.
Smintichendu u ghjudiziu
Da la mani à la sera,
Frustani quissa tastera
Porta aparta ad ugni viziu,
Quandu cresci l’artifiziu
È l’illusioni s’avvera.
Chjappi da quissu dimoniu
Senza visu nè materia,
Scrochja ugni cosa seria
Fendu piazza à u sonniu,
Invintendu un bisognu
Ch’ùn arreca ch’è miseria.
Campu santu di a menti
Di l’almi pidda pussessu,
È l’omu hè suttumessu
À st’arnesi unniputenti,
Scantendusi di a ghjenti
Sin’à scurdassi sè stessu.
A sucità faci mora
È tuttu ciò ch’hè sirenu,
Sparghjendu u so vilenu
U naturali divora,
Dunqua isciti appena fora
È spinghjitimi issu screnu !