E so rime sempre in fiore
Scritte nant’ à u quadernu
Incù l' inchjostru d'amore
Fiuriscenu ogni veranu
In lu core di l'umanu
È u core di l'umanu
Quandu hè pienu di puesia
Si pesa a u più supranu
Mette l'omu in armunia
Cum'è u soffiu di fratellanza
D'amicizia è di speranza
U pueta hè pellegrinu
È sumena i so sonnii
Scalda u core di u mischinu
Imbellisce i so ghjorni
Porghje a manu à u zitellu
U riccu è u puvarellu
Si u core hè orfanellu
Di mele l'inzucchereghja
È trova sempre un fratellu
À l'anima chì strazieghja
È u so raghju di sole
Hè u più dolce calore
U pueta ùn pò more
Chì a so sumente in granu
Cum'è u più chjaru albore
Hè un fiore chì nasce in manu
Biancu è immaculatu
Cum'è un core innamuratu