In poesia o ne l'improsa
Di più canochja ch'è pollone
A mio musa hè lesinosa
In capu ci aghju un cavone
Tuttu facciu à l'arritrosa
Diu sà cum'ell'hè stata
U fattu di piglià penna
Da chì troppu pesu in grata
È ne chjocca una tintenna
Chì ne rompe a sonnata
S'è u burdinale chinchenna
À chì u sà s'è a scrittura
Stà squilla chì tene arrittu
In qualchì manera cura
Castagnu ùn stattine zittu
Sai ch'ùn sò à l'altura
Sò valonchja d'alcun profittu
Degna ùn sò, una ruvina
Per farina ùn mi ci vole
Ùn possu esse frandulina
Più pocu per e fasgiole
In capu stà cilindrina
Testu un paspu o casserole
Ùn seraghju a merolla
Sott'un canavacciu infusu
Nimu à mè m'hà da ingolla
Incù vinu chì n'hè l'usu
In un ame m'hà da infrolla
U tempu hè ùn la ricusu
Per mè ùn vale u forestu
Ùn ne aghju cunsistenza
V'assicurgu u bisestu
È mai l'indipendenza
Incù mè vera prestu
La più cruda evidenza
Bona ùn sò per a manesca
Trà coscogliule in poche parulle
Poeteghju ne l'aria fresca
Ma ghicci mi movenu rulle
Dicenu ch'ella hè pazzesca
La mio musa è ùn sò brulle
Ch'ella hè goffa sta sonaglia
Di mette battagliolu di bombace
Tofinatu hè sta frangaglia
Di lascialli gode e so pace
Di falla finita incù st'anticaglia
Hè ora ch'ella si tace
Di fà di sta ritornella
Un cortissimu ritagliu
Un riassuntu una letterella
Ùn vale un sprichju d'agliu
Una bocconata di maccarella
Di mettela à sbaragliu
Minata sò stata di magliola
Ùn mi toccanu l'animali
Mancu ne sò castagnola
Chì sò ùn rompe stivali
Nunda à mè mi cunsola
Surelle ditene quant'i giornali
Ùn guerdate à e spese
Le tonessi e tunate
Sonessi e campanese
Rime n'avete aggalabate
Ùn aghju eo alcun' difese
Facciu ride e sporte mirate
Ùn anderaghju à accaticammi
In u locu induv'sÒ nata
Facciu rime è ricami
Ne sò lode per qualchì fata
Da annodà forti ligami
Trova una camerata
Mai ne serò di a dispenza
Sta pietanza per li morti
Di sta poesia mi ne stò senza
È mi tengu tutti li torti
Ùn n'aghju vistu crescenza
Ne sò di li sconci è l'aborti
Ùn vole dì m'hè passata
S'è ùn sò quella guirlanda
Sta collana inzuccherata
Ne seria in veneranda
À stà incù mele onorata
Per i chjuchi à so vivanda
Ma fammi sente a to sguilla
Cantacuccu maiò poeta
Ai fama ch'andessi à dilla
À e teghje annant'à a reta
Di l'estru dammine una spilla
Chì ne sì cum'è un profeta
A sò ch'ai sta malatia
È chì ind'è mè si sprime
Pò anch'esse di simpatia
L'inchjostru chì ùn ne hà stime
Ti rode dici à l'angunia
Eo ne facciu tinte rime
Vecu chì sì megliuratu
Chì ci ai tante pollezze
Da elle si incoronatu
Smilze tutte cum'è frezze
Un San Sebastianu beatu
Carcu e radiche di ste dolcezze
Vistu ai u cattivu stintu
Di l'omi quand'i to filari
In suchju n'ere crosciu intintu
Listessa per i to pari
Lenta un lamentu cunvintu
Per l'omi sempre i cochjari
Quant'e volte t'anu scapatu
Ùn ne pudia aprofitta
Di tuttu lu to frascatu
Senza vuletti affitta
Quantu ne fù tu sfruttatu
Per sempre e rosse ghjitta
Cum'è l'omi ne sì di l'emme
À questi tuttu li hè devutu
Dimmi tù puru ghjasteme
Cumu hè chì ti sì mutu
In a fica ci mettu speme
Ci hà fichi scritti in aiutu
U paisanu in secchereccia
Quandu i foconi ùn sò spenti
Una strofata a s'intreccia
Puru s'è u fume li dà pienti
Poi ne butta a corteccia
A chjoppula ghunt'i momenti
Chì in saccula hè previstu
Seranu e ghjentile di u paese
Incù pilose in un mistu
Dopu u troppu ùn sò offese
Anu da esse nude in Cristu
Tandu sì chì sì sò rese
Si ferà bomba di pulenda
Incù dinò castagne cotte
E prelibata merenda
Sò sbuchjate incù ballotte
Eo valonchja a mio vicenda
Hè smari sola in la notte
Faci parte di i castagnoni
Ma simu di listessu legnu
Tù ne sì di i lioni
È eo vi facciu segnu
Tù fattu ci ai di i libroni
Eo un picculu disegnu.