Micca un giallu lazzu, un giallu tristezza, innò !
Un giallu francu, un giallu murza, un giallu caldu !
Da avviluppà d'oru ogni sponda, eppo...
Ti scriveraghju in azuru.
Azuru sonniu, azuru alzatu in volu !
Di l'acula di l'Alisgiani, di i so sciali per iss'altura,
È di a vita chì nasce à l'acqua di un ochju.
Ti scriveraghju in niellu...
U niellu di a furesta à l'annuttata fatta,
Di sti castelli chjosi à colpi di cultellu,
Di e torre genuvese duve a lumera hè smatta.
Ti scriveraghju torna... in spanu.
Spanu pelame di quelli, à cavalcà,
In e pianure stese di stu Cuscionu pianu ;
U galoppu di a storia per isse sponde s'incalca.
Ti scriveraghju in malvu !
U malvu di certi fiori, di quellu "Amore Piattu",
S'ellu mi conta a morte, mi pò contà u salvu.
Mi ramenta mammone, u so spentu ritrattu...
Ti scriveraghju in turchinu.
Turchinu pagnu, turchinu fondu di mare,
Chì risciuma u Piali, biancu alabastrinu ;
Matrimoniu di cuntrasti in Bunifaziu altare.
Ti scriveraghju in russicciu.
Russicciu ardente, russicciu ora d'attrachjata,
D'un core à spasimà, à sonniu scappaticciu...
À quale infine hè tesa a manu innamurata.
Ti scriveraghju infine... in verde.
Un verde zeppu, un verde chì invita
À viaghjà, à parte è à perde si
In e cunfine più innaspettate di a vita.
Ti scriveraghju cusì forse iè...
O forse nò... Forse ùn ti scriveraghju.
Ùn ci hè bisognu à scrive per leghje
I to versi, in ogni paisaghju.
In ogni sponda. In ogni stonda.
Tù chì sì puesia, armunia prufonda...
Tù...
Puesia di u Vaghjime.