Nimu ci vole più andà
Nè grande nè chjucucci
Ùn si vole più cansà
Chì quella di Campanari
Ralegra i so sculari
Di a ferla è a mazzetta
Oghje ùn hè più l’usu
Cusì sta cosa hè detta
Sò ne parlu mi ne scusu
Chì tandu l’educazione
Era in punta di u bastone
Soca era nu penseru
D’accende tante lumere
U maestru n’era fieru
D’amparanne lu saltere
Per avenne un impiegarellu
Ci vuglia à esse struitellu.
Si sviluppa u quartieru
U vechju cum'è u novu
Ognunu ci campa fieru
Oghje più riccu lu trovu
A so scola Campanari
Ingranda tutti à pari
Cù diverse pupulazione
A scola li face fronte
Duve passa l’integrazione
Ogni saltu mette un ponte
Di mesura d’egalitai
Corciu s'è tù ùn ci vai
N’alpelata stà la scola
San Ghjiseppu lu puntellu
A Madonna di Ficaghjola
Sotta lu più bellu stellu
Cù lu trattu di Teghime
Li carezza le so cime