Quandu ellu canta u culombu
Hè partutu u rusignolu
Ogni zitella in sicretu
Tene in core un pampasgiolu
Tistimone stramurtitu
Di u so amore novu
Pà San Martinu in carrughju
Face festa ogni cantina
A dulcezza impassita
Di a stagione cammina
Purtendu u caldu à l'invernu
È u fretu à a statina
Quandu ellu canta u culombu
Si cerca a ghjira una tana
Pare imbriacata l'apa
Incù l'uva di a Sulana
Facciata ogni mela rossa
Hè dolce cum'è a manna
D'esse pichjulatu rossu
À u caracutu tocca
È par caccià li so frutti
Sgrigne u gricciu a bocca
Pà li morti è li santi
Forte a ciccona chjocca
Quandu ellu canta u culombu
Hè ingrussatu lu fiume
Si ralegra u grataghju
Di l'insitina u prufume
U prima istracciu di neve
Veste a muntagna di lume
U sole si face frollu
È rispara u so calore
U volu di u culombu
In celu invita à l'amore
Hè svitatu lu Canale
È impiaghjatu u pastore
Quandu ellu canta u culombu
Di ghjanda u purcellu hè techju
U sciappale di l'Arnella
Luccicheghja cum'un spechju
Pare stampatu in a petra
D'ogni stellu lu rispechju
Sò agrunchjati li ghjorni
Cù lu frescu muntagnolu
È si sente u pulindaghju
Minà quant'un battagliolu
Di cuntintezza in lu testu
Sciuppiteghja lu fasgiolu
D'oru è di bronzu u frundame
In tarra u gricale spazza
In aria u so mulinellu
Piglia ogni fronda è a tazza
Rughjinisce u filittaghju
Duva si piatta a biccazza
Porta incun ellu u culombu
L'acqua di e piuvitelle
Chì rinfresca la natura
Currendu in le calanchelle
Cantanu par ignilocu
D'aligrezza e pisciarelle
Pà disgrazia s'ellu stava
Mutu u culombu turchinu
Senza mancu un bacu rossu
Saria u rochju albitrinu
Eppo di a Cursichella
Cambiaria lu distinu
È pà l'ottu di dicembre
Risona in ogni rughjone
U cantu di u culombu
Par difende a Nazione
Prichendu à i so figlioli
A santa pace è l'unione