Squarcini petru - Parla...

Parla cun mecu di a to storia
Parla di ciò chì fù pà noi
Metti à palesu a mimoria
Di l'antichi corsi eroi
Ch'aviani in cori u so spirà
È nant'à i labbri a libertà

Parla d'oghji è di dumani
Di a cultura di a to tarra
Metti l'avvena in i to mani
Ùn lascià smattà a fiara
Di sta lingua maestosa
Viva fiera è valurosa

Parla parla sta lingua ch'hè toia
Parla incù u stintu è a voglia
Di mantena senza svià
L'essenza di a to identità

Sò sincera ùn cercu scusa
Sò passioni è sò primura
Di u pueta a so musa
Chì mi scriva è mi sussura
U silenziu è u rimori
A scurezza è u chjarori

Eiu sò a lingua mamma
Chì faci populu è nazioni
È sulleva ogni chjama
Di vulintà è d'unioni
Pà parlà sempri à campera
Incù l'estru d'amparera

Parla parla sta lingua ch'hè toia
Parla incù u stintu è a voglia
Di mantena senza svià
L'essenza di a to identità