Dopu avè campatu quì
Sceglierebbe l'estate
Per infine vultà è fiurì
In un mazzulu d'amore
Purtà a Pace in ogni core
S'eo pudia rinasce
Dopu avè lasciatu quì
I mei in e so lacrime
Cù ciò ch’ùn aghju pussutu dì
Scriverebbe dui filari
Fà sapè quantu eranu cari
S’eo pudia rinasce
Dopu avè speratu chì
Omu pudia parte
Senza circà à capì
Mi ne vulterebbe tandu
Cù un rigretu tamantu
S’eo pudia rinasce
Dopu avè intesu dì
Chì quandu finite le strade
Ùn ci hè sorte à l'infinì
Camperebbe a mo furtuna
Chì vita… ùn ci ne chè una