Bardanzellu - Lu distinu di l'omu

Canti cuntrasti si fàcini pa cilcà di cumprindì
si lu distìnu di l'omu è pùlvara o àlitu divìnu
candu un calcaréddhu d'òssi vèni rimùsu drent' a un campusantu !
Eu l' àgghju figghjulàti cu attinziòni,
una accùltu  a  l'àlta,
tanti grùci di lìgnu in un quadru di tarrènu nudu,
ùndi créscini solu  la ràmina e  calche piantaréddha d'ultìcula.
Celti nòmmi si lègghjni ancora
ma palt' e più si l'à magnàti  lu tèmpu inguddhòssu.
Un còntu pa dugna grùci ma...ca si  n'ammènta più.
So cònti carragghjàti sutt'a un palmu di tarra,
data quasi pa limosina,
pa no intindé càlche pìccu a la ghjànna di la cuscènzia.
Più a chiddhàla,
l'ùmbra d'un àlburu casàli si stèrri innàntu a li màlmari lùccichi.
Agghju  ciuccàtu a dùgna tùmba
chjamèndi  passòni ghjùnti  da mònti e custéri
innant' a  càrruli trasginàti da cabàddhi niéddhi impinnacchjàti
ma no àgghju  intésu rispòsta.
Mancu l'amìchi àni cunnisciùtu la mé boci
o fòrsi  aaràni rìsu di mè
palchì no pussédu curàgghju bastànti
pa accittà lu distìnu o punìlli calche barràncu.
Mi saràni tinèndi lu locu pa candu n' aaràgghju bisògnu.