senza più sentene l'ira !
Da Cirnu l'omu nativu
ogni strisciula si tira
eppo di ghjudiziu privu
à vendesi la, cuspira.
Scurticata Cursichella
è di suchju lacrimosa.
Quì per una scaranzella
spachjata vituperosa,
li ti strappanu a pelle
ch'ùn li guarisce scabiosa.
Corsica venduta à striscie
In le so più grasse piaghje,
poi lu fruttu abbastardisce
cupertu da e lamaghje
per pudenne custruisce
tante case cum’è piaghe!
E to sponde Cursichella:
bianche cun lisci renaghji
u prufittu i sfracella
tornanu lochi merdaghji
è ti chjodi in citadella
incu l'altri marmaraghji
Corsica le to ferite
ma' piu, nun si ponu bolle
sò vernice immarcite
ferme nant' à e pagliole,
sò tante vite smarite
chì oghje più nimu ùn vole.
Inseppelita Cursichella
di catramu è di cimentu,
s'hè siccat'a funtanella,
anu rottu u palmentu.
Per a santa rundinella
he dinù cambiatu ventu.
O Corsu porti rispettu
à u pocu chì ti ferma,
a terra ghjè lu to lettu
micca un fruttu chì s'avverma
fanne un locu dilettu
per sempre ch'ellu s'inghjerma.